Shugaba Bola Ahmed Tinubu Ya Yaba wa Sojojin Najeriya Bisa Kwarewarsu da Sadaukarwa
- Katsina City News
- 09 Jul, 2024
- 163
Maryam Jamilu Gambo, Katsina Times
Shugaban kasa Bola Ahmed Tinubu GCFR ya yaba wa Sojojin Najeriya bisa kwarewarsu da sadaukarwa wajen tabbatar da zaman lafiya da tsaron ƙasar.
Shugaban ya bayyana haka ne ta bakin Ministan Tsaro, Mohammed Badaru Abubakar, a yayin bikin rufe Ranar Sojojin Najeriya ta 2024 a Maxwell Khobe Cantonment Jos, Jihar Plateau.
Shugaba Tinubu ya yaba da kokarin sojojin wajen magance matsalolin tsaro na ƙasa, yana mai cewa rundunar ta tashi tsaye don kare Najeriya.
"Muna rayuwa a duniya mai cike da rikice-rikice, kuma dole ne rundunar sojojinmu ta ci gaba da canzawa don fuskantar sabbin ƙalubalen da ke tasowa. Na samu labarin cewa kun gudanar da tattaunawa kan halin tsaro mai cike da rikice-rikice a wani ɓangare na bikin Ranar Sojojin Najeriya. Wannan abu ne mai kyau da ya dace domin ku kasance cikin shiri don fuskantar waɗannan ƙalubalen," inji shi.
Shugaban ya jaddada aniyar gwamnatinsa na gina rundunar sojojin da aka tanadar da kayan aiki da kwarewa, inda ya bayyana matakan da aka amince da su don inganta ƙwarewar sojojin, ciki har da biyan Group Life Assurance ga sojojin da suka rasu da kuma sayen jiragen sama na yaki da kayan aikin yaki.
Ya jaddada buƙatar ƙirƙira, ƙwazo, da haɗin kai tsakanin hukumomin tsaro don magance sauyin yanayin tsaro.
"Na ƙarfafa ku da ku ci gaba da aiki kafada da kafada da sauran hukumomin tsaro da kuma 'yan ƙasa. Babu shakka kuna wakiltar alfarmar ƙasa; wata cibiya mai tarihi; cibiya da ba ta taɓa gazawa wajen kare Najeriya ba," inji shi.
Shugaban ya ce yana alfahari da yadda aka shirya bikin Ranar Sojojin Najeriya da kuma yadda aka gudanar da shirin, yana mai cewa ya tabbata rundunar sojojin Najeriya ta tabbatar da amincewa da aka ba ta na kare iyakokin ƙasa.
Taron ya samu halartar manyan jami'an gwamnati da manyan jami'an soja, ciki har da Karamin Ministan Tsaro, Dr. Bello Muhammad Matawalle, Shugaban Ma'aikatan Tsaro, Shugaban Ma'aikatan Sojoji da sauran manyan jami'an gwamnati.
Search
Category
Tags
Social Media
